Naharang sa Bureau of Customs (BOC), ang kapin ₱136 milyon nga kantidad sa mga undeclared ug peke nga produktong agrikultura sa Port of Manila.
Gipangulohan ni BOC Commissioner Ariel Nepomuceno, ang inspeksyon sa 25 ka shipping containers nga una’ng gi-deklarar nga plastic racks, apan sa dihang gi-utingkay na, nasuta nga puno kini sa lain-laing kontrabando nga produkto gikan sa China.
Lakip sa mga nasakmit mao ang ginantang bugas ug asukal nga nagkantidad og kapin ₱18 milyon, samtang adunay mga peke nga produkto nga miabot og ₱59 milyon.
Dugang pa, narekober ang mga butang nga gilangkuban sa kemikal nga nagkantidad og ₱101,000, ukay-ukay o ginamit nga sinina nga kapin ₱22 milyon, electronic items nga ₱2.1 milyon, pharmaceutical products nga ₱669,000, mga pagkaon nga nagkantidad og ₱43.75 milyon, ug lain-laing commodities nga milapas sa ₱34 milyon.
Nadiskobrehan usab ang mga cosmetic items nga walay label ug wala marehistro, nga posibleng delikado sa kahimsog sa mga konsumidor.
Matod pa ni Nepomuceno, kining matang sa pagpanglimbong pinaagi sa sayop nga deklarasyon sa kargamento makadaot dili lamang sa kita sa gobyerno kondili sa kaluwasan sa publiko ug sa lehitimong negosyante.
Gipasigarbo usab sa BOC nga ilang hugtan ang pagbantay sa mga pantalan aron mapugngan ang pagsulod sa mga ilegal nga produkto sa nasud.
Samtang karon, gisugdan na sa ahensya ang imbestigasyon ug forfeiture proceedings ubos sa Customs Modernization and Tariff Act batok sa maong shipment.
Photo Courtesy: Philstar
