Nisaka sa rekord ang koleksyon sa Bureau of Customs o BOC sa bulan sa Abril human kini nakaabot og Php86.4 bilyon, bisan pa sa pagsuspinde sa buhis sa kerosene ug LPG nga gipatuman sa administrasyon ni Pangulong Ferdinand Marcos Jr..
Labaw kini sa target nga Php78.6 bilyon sa maong bulan, nga nagresulta sa sobra o surplus nga Php7.8 bilyon, ug mas taas usab og 15.7 porsyento kumpara sa miaging tuig.
Sumala sa BOC, ang ilang total nga koleksyon gikan Enero hangtod Abril niabot na sa Php325.81 bilyon, nga mas dako sa target ug nagpakita og padayon nga kalig-on sa kita sa gobyerno.
Gipasabot ni BOC Commissioner Ariel Nepomuceno, nga ang maong kalampusan resulta sa disiplina, integridad ug modernisasyon sa ilang mga proseso.
Bisan pa sa epekto sa global nga kahimtang ug mga kausaban sa polisiya, nagpadayon gihapon ang BOC sa paghatag og dako nga kontribusyon alang sa mga programa sa gobyerno ug nasudnong kalamboan.
Photo Courtesy: philstar
