Gipakita sa Kapamilya actress ug host nga si Kim Chiu ang lahi nga paagi sa pagsaulog sa iyang kaadlawan pinaagi sa paghatag og libre nga gasolina ug grocery packs sa mga drayber sa Quezon City.
Sa iyang pinakabag-ong vlog, gisaysay sa bida sa The Alibi nga nakatabang siya sa kapin 600 ka drayber pinaagi sa iyang inisyatiba. Gawas sa libre nga gasolina, gipanghatagan usab niya og grocery items ang ilang mga pamilya.
Sumala kang Kim, ang pondo alang sa maong kalihukan gikan sa iyang gihimong closet bazaar, diin ang kita gigahin aron makatabang sa uban.
Sa maong vlog, personal niyang giadto ang tulo ka gasolinahan sa Quezon City aron ipanghatag ang mga stub para sa gasolina ug grocery packs, nga gidawat sa mga drayber uban sa dakong kalipay.
Gibutyag usab ni Kim ang iyang mga realizations sa kinabuhi samtang nagkatigulang siya, nga ang kinabuhi puno sa mga kalit nga pagsulay ug leksyon nga makapalig-on sa usa ka tawo.
Gipasiugda niya nga ang paghatag dili lang paghatag kundi usa usab ka paagi sa pagdawat, ilabina sa gugma ug kalipay nga mobalik ngadto sa naghatag.
Nagpadayon usab siya sa pagpasalamat sa walay hunong nga suporta gikan sa iyang pamilya, higala, ug mga fans, ug giingon nga ang iyang kaadlawan dili lang selebrasyon sa edad kundi sa pagtubo, leksyon, ug gugma nga iyang nadawat.
Photo Courtesy: PEP.ph
