Nakaapekto ang kakulang sa tubig sa daghang tourist spot sa Japan atol sa selebrasyon sa Golden Week, nga giingong resulta sa gamay nga ulan sukad pa sa miaging ting-init. Tungod niini, napugos ang pipila ka negosyo sama sa mga sightseeing boat ug hot spring facilities nga mopamubo sa ilang oras sa operasyon.
Sa palibot sa Mount Fuji, mikunhod ang lebel sa tubig sa mga lanaw sama sa Lake Motosu ug Lake Kawaguchi. Tungod niini, gisuspinde ang pipila ka boat tours ug giusab ang mga ruta sa biyahe.
Sa Lake Chuzenji, dili na makadaong ang mga sakayan sa pipila ka pantalan tungod sa ubos nga lebel sa tubig, hinungdan nga giusab usab ang ilang mga ruta.
Bisan pa niini, giingon sa mga operator nga adunay “rare landscape” nga makita karon tungod sa ubos nga tubig, bisan og adunay kahasol sa mga bisita.
Sa ubang dapit, sama sa lungsod sa Tomioka, napugos ang usa ka hot spring facility nga ihunong ang paggamit sa ilang open-air baths ug limitahan ang operasyon. Misaka usab ang ilang adlaw sa pagsira matag semana, ug mikunhod ang ihap sa mga bisita.
Samtang ang uban nga lugar naka-recover na, sama sa Chikuhoku, diin gibawi na ang water restrictions human sa paningkamot sa mga residente sa pagtipig og tubig.
Sumala sa mga opisyal, padayon ang kabalaka sa epekto sa kakulang sa tubig sa turismo, apan naglaum gihapon ang mga operator nga mopadayon ang pagdagsa sa mga bisita.
Photo Courtesy: PNA
