Gibutyag ni Senate President Pro Tempore Panfilo Lacson nga pito ka mga senador ang nipirma sa partial committee report sa Senate Blue Ribbon Committee bahin sa giingong mga anomaliya sa flood control projects.
Matod ni Lacson, kinsa mao usab ang committee chairman, ang labing ulahi nga mipirma mao si Sen. Raffy Tulfo. Lakip sa mipirma sa report mao sila si senador Erwin Tulfo (committee vice chair), Risa Hontiveros, Paolo “Bam” Aquino IV, Francis “Kiko” Pangilinan, Raffy Tulfo, Senate President Vicente “Tito” Sotto III, ug Lacson mismo.
Apan matud ni Lacson nga kuwang pa kini sa gikinahanglang siyam ka pirma aron maapil ang diskusyon ug aksyon sa committee report sa plenaryo, subay sa lagda sa Senado.
Sa iyang privilege speech, si Lacson niinsistir nga hapit na tulo ka buwan nga pending ang maong report ug gipasabot nga dili na bag-o ug validated na ang unod niini.
Siya miingon nga ang matag miyembro gihatagan ug igong panahon sa pagrepaso sa kapin sa 400 ka panid nga taho ug pagsugyot ug mga kausaban kon gikinahanglan. Matod niya girespeto niya ang desisyon sa pipila ka mga senador nga dili mopirma bisan og wa siya makauyon niini.
Photo Courtesy: Senate of the Philippines
