Mokabat sa ₱50 mil nga kantidad sa kwarta ang naabo human miulbo ang sunog sa usa ka panimalay pasado alas 1:30 sa hapon niadtong Abril 30, 2026 sa Purok 6, Apo Macote, Malaybalay City, Bukidnon.
Sumala sa inisyal nga imbestigasyon sa Bureau of Fire Protection, gituohang electrical-related ang hinungdan sa sunog, ug giimbestigahan karon ang usa ka ceiling fan nga posibleng sinugdanan sa kalayo. Gibanabana nga mokabat sa ₱35K ang kabahin sa direktang kadaot.
Gipanag-iya ang maong panimalay sa magtiayon nga sila Sarah Jean, 32-anyos, ug Marjohn Navarra, 37-anyos, nga residente sa maong lugar.
Sa pamahayag, si Sarah Jean ra ang naa sa balay sa dihang nakadungog siya og murag pagbuto, apan wala kini niya hatagi dayon og pagtagad tungod kay abi niya adunay nagsunog og basura sa palibot. Wala madugay, namatikdan niya ang aso gikan sa kwarto ug sa pag-abli niini, iyang nakita ang kusog nga pag-ulbo sa kalayo.
Gisulayan pa unta niya pagluwas ang kwarta ug uban pang gamit apan wala niya kini makaya tungod sa kusog sa sunog. Lakip sa mga nasunog ang telebisyon, bag-ong compressor, cellphone, pitaka nga adunay laing kantidad sa kwarta, ug uban pang kabtangan.
Padayon ang imbestigasyon aron matino ang eksaktong hinungdan sa sunog.
