Misaka og 20 porsyento ang gidaghanon sa mga insidente sa sunog sa probinsya sa Bukidnon karong tuiga, sumala sa report sa Bureau of Fire Protection sa probinsya sa bukidnon, nga nakatala og 109 ka kaso gikan Enero hangtod Abril 2026 kumpara sa 90 ka insidente sa unang kwarter niadtong 2025.
Sa esklusibong pakighinabi sa Juander Radyo Malaybalay ngadto kang SFO1 Rene R. Rubillos sa BFP Bukidnon iyang gipadayag ang kasagarang hinungdan sa mga sunog naglakip sa pagpasagad sa pagluto, mga problema sa kuryente sama sa wala ma-unplug nga appliances, ug mga sunog sa sagbot nga mahimong tinuyo o resulta sa grabeng kainit. Ang mga lugar nga adunay pinakadaghang natala nga kaso mao ang Valencia City, Malaybalay City, Maramag, ug Manolo Fortich.
Sa kinatibuk-an, miabot na sa kapin 10 milyones pesos ang kantidad sa kadaot tungod sa sunog sulod sa unang upat ka bulan sa 2026. Pinakadako ang natala sa bulan sa Marso nga mikabat og ₱5 milyon, gisundan sa Abril nga adunay ₱3 milyon, Enero nga ₱2 milyon, ug Pebrero nga ₱600,000.
Gipasabot sa mga otoridad nga ang padayon nga epekto sa El Niño Phenomenon ug ang alerto gikan sa Philippine Atmospheric, Geophysical and Astronomical Services Administration nakadugang sa risgo sa sunog tungod sa taas nga temperatura ug uga nga palibot.
Gipahinumdoman sa BFP ang publiko nga magpabiling alerto ug mag-amping sa paggamit sa kalayo ug kuryente aron malikayan ang dugang pang insidente sa sunog sa komunidad
Photo Courtesy: BFP – Bukidnon
