Nakurat ang mga staff sa usa ka punerarya human kalit nga nabanhaw ang usa ka 91-anyos nga lola nga gideklarang patay na sa doktor.
Giila ang maong babaye nga si Janina Kolkiewicz, nga una nang giingong patay human masusi nga wala nay pulso ug wala na nagaginhawa. Tungod niini, gihimoan siya og death certificate ug gidala ang iyang lawas sa cold storage sa morgue aron ipreserba.
Apan human sa kapin 11 ka oras, nakurat ang mga empleyado sa punerarya dihang namatikdan nila ang kalit nga paglihok sa body bag diin gisulod ang lola.
Sa dihang nakagawas na, giingon nga normal ra ang kahimtangan ni Janina Kolkiewicz. Pag-abot niya sa ilang balay, mihigop pa siya og init nga sabaw ug mikaon og pancakes nga daw walay nahitabo.
Ang insidente nagbilin og dakong katingala ug kabalaka sa iyang pamilya ug doktor. Tungod niini, gipailawom na sa masusing imbestigasyon ang nahitabo aron masuta kung giunsa pagdeklarar nga patay ang usa ka tawo nga buhi pa diay.
Photo Courtesy: Daily Mail
