Patay ang usa ka lalaki, human kining nahulog sa Matigol Falls sa Datu Ladayon, Arakan, Cotabato, niadtong milabyang adlaw.
Giila ang biktima nga si Ronald Carlos “Bobong” Mangga. Sumala sa report, nagpakuha pa kini og hulagway sa daplin sa falls sa wala pa ang insidente dihang aksidente kining nahulog.
Tungod niini, gipanawagan sa publiko ngadto sa lokal nga panggamhanan nga palig-onon ang mga lakang sa seguridad sa lugar. Lakip sa gisugyot ang pagbutang og permanenteng harang sa peligroso nga mga dapit, mas klaro nga warning signage, ug pagdugang og personnel nga motabang ug magbantay sa mga turista.
Nailhan ang Matigol Falls nga usa sa labing taas nga falls sa probinsya, nga gibanabana nga moabot og 500 metros ang kahabugon. Bisan og dinarayo tungod sa natural nga katahum, dugay na kini giila nga high-risk area tungod sa danlog nga bato ug taas nga pangpang.
Dili na usab kini ang unang insidente sa lugar, asa aduna nay natala niadtong 2018 nga pagkamatay sa usa ka tourist guide ug niadtong 2019 nga gikamatay usab sa usa ka turista.
Photo Courtesy: Almarie Vicente
