Nagpatuman og water rationing ug nagpalig-on sa mga lakang ang City Disaster Risk Reduction and Management Office (CDRRMO) sa Malaybalay City aron matubag ang kakulang sa suplay sa tubig nonut sa El Niño.
Sumala kang CDRRMO head Allan Comiso sa pakighinabi sa Juander Malaybalay lakip sa mga inisyatiba ang pagpatuman sa iskedyul sa water rationing aron patas nga mabahin ang limitadong tubig, ingon man ang pagpalit og tulo ka bag-ong water tanker ubos sa direktiba ni Mayor Warren Pabillaran.
Nagpadayon sab ilang koordinasyon sa lain-laing ahensya sama sa Bureau of Fire Protection (BFP), PrimeWater, Malaybalay City Water District (MCWD), ug City Mayor’s Office aron masiguro ang hapsay nga pag-apod-apod sa tubig. Samtang nakigtigom sa mga barangay kapitan aron magtakda og guidelines kon pila ka tubig ang ihatag sa matag pamilya, aron malikayan ang kagubot sa distribusyon.
Tungod sa gideklarar nga state of emergency, gihatagan og prayoridad sa water delivery ang mga barangay nga adunay gamay kaayong suplay sa tubig, ilabi na sa bahin sa “Highway South” nga naglakip sa San Jose, Laguitas, Magsaysay, Mapayag, Bakaslsang, Cabangahan, Linabo, Aglayan, Barangay 9, Patpat, ug Dalwangan.
Giawhag ang publiko nga mokontak sa hotline sa CDRRMO sa numerong 0917-827-6117 alang sa emerhensya nga panginahanglan sa tubig
Photo Courtesy: CDDRMO
