Liboan ang apektado sa dakong sunog sa kalasangan sa lungsod sa Ōtsuchi, Japan Abril 28, 2026, hinungdan sa dakong kadaot sa kalasangan ug pagpabakwit sa mga residente.
Sumala sa mga awtoridad, ang sunog nga nagsugod niadtong Abril 22, mikalat na sa kapin 1,600 ka ektarya nga kalasangan. Tungod niini, gibana-bana nga labaw sa 3,200 ka mga lumulupyo ang napugos sa pagbiya sa ilang panimalay aron malikayan ang peligro.
Padayon ang operasyon sa mga bombero ug rescue teams aron mapugngan ang pagkaylap sa kalayo, apan naglisod sila tungod sa kusog nga hangin ug uga nga kahimtang sa panahon.
Aduna na usab mga report sa pipila ka mga tawo nga naangol, samtang may ubang kabalayan ang nadaot sa sunog. Wala pay klaro ang eksaktong kantidad sa kadaot sa kinatibuk-an.
Samtang ang gobyerno sa Japan nagpadayon sa paghatag og tabang sa mga apektadong residente, lakip na ang temporaryong kapuy-an, pagkaon, ug medikal nga serbisyo.
Padayon usab ang pahimangno sa mga awtoridad sa publiko nga magbantay ug mosunod sa evacuation orders aron malikayan ang dugang nga peligro. Ang maong sunog giisip nga usa sa pinakadako nga wildfire nga natala sa Japan.
Photo Courtesy : PSW/PSU
