EKONOMIYA SA DAVAO REGION MISAKA OG 5.1% SA 2025

Gipahigayon sa Philippine Statistics Authority Region XI ang usa ka news conference sa Davao City isip kabahin sa nationwide simultaneous release sa 2025 Regional Accounts of the Philippines (RAP).

Ang maong kalihokan gihimo aron ipresentar ang pinakabag-ong datos sa ekonomiya sa Davao Region, uban ang partisipasyon sa PSA ug sa regional development planners.

Sumala sa gipresentar nga datos, mitubo ang ekonomiya sa Davao Region og 5.1% sa 2025, nga mas taas kaysa national average nga 4.4%. Ang total nga kantidad sa ekonomiya (Gross Regional Domestic Product o GRDP) miabot sa ₱1.14 trillion, nga nagpakita og padayon nga pag-uswag gikan sa miaging tuig.

Kini nga performance nagbutang sa rehiyon isip usa sa mas paspas nga nagtubo nga ekonomiya sa nasud. Gipasiugda sa PSA nga ang services sector mao ang nag-unang giya sa pagtubo, nga mitampo og 62.1% sa GRDP ug nagtala og 6.9% nga growth.

Gisundan kini sa industriya (24.7%) ug agrikultura, forestry ug fishing (13.2%). Bisan pa sa mga hagit sa miaging tuig, nakabangon usab ang agrikultura nga sektor ug nakatala og positibong pagtubo.

Sa kinatibuk-an, gipakita sa news conference nga lig-on gihapon ang ekonomiya sa rehiyon sa Davao, nga gisuportahan sa kusog nga serbisyo ug nagpadayon nga kontribusyon sa ubang sektor. Ang maong datos gigamit isip basehan sa policymaking ug development planning aron mas mapalambo pa ang ekonomiya sa rehiyon sa umaabot nga mga tuig.