Paspas nga nakalusot sa sunod nga hugna sa NBA playoffs ang Oklahoma City Thunder human nila gi-palong ang nag dilaab nga kainit sa Phoenix Suns sa first round, nga nag resulta sa 131-122 nga kadaugan sa Game 4.
Gipangulohan ni Shai Gilgeous-Alexander ang Thunder pinaagi sa 31 puntos ug walo ka assists, nga nakatabang sa koponan aron makompleto ang 4-0 nga serye kontra Suns.
Matod ni Gilgeous-Alexander, nagpakita ang ilang team og panaghiusa, nga maoy hinungdan sa ilang sunod-sunod nga kalampusan sa playoffs.
Ang Thunder, nga defending champion ug top seed sa Western Conference, maoy unang team nga nakaabot sa second round. Sunod nilang atubangon ang modaog tali sa Los Angeles Lakers ug Houston Rockets, diin nag-una karon ang Lakers, 3-1 sa serye.
Dugang kusog sa Thunder si Chet Holmgren nga adunay 24 puntos ug 12 rebounds, samtang si Ajay Mitchell nakatampo og 22 puntos ug si Isaiah Hartenstein adunay 18 puntos ug 12 rebounds.
Sa bahin sa Suns, si Devin Booker maoy nanguna sa scoring uban ang 24 puntos, apan dili kini igo aron mapugngan ang kusog nga opensa ug depensa sa Thunder.
