Gi-raid sa mga otoridad ang usa ka daycare center nga Little Aresha sa nasud sa Indonesia human sa report nga adunay pagpangabuso sa mga bata. Atol sa operasyon, nakita nga dunay mga bata nga gigapos ang kamot ug tiil diin diaper lang ang gisuot.
Sumala sa awtoridad, labing menos 53 ka bata ang giingong nabiktima sa pag-abuso o pagpasagad. Kadaghanan sa mga bata ubos pa sa duha ka tuig ang edad. Nakita usab ang gagmay nga kwarto diin didto naghuot ang mga bata ug klarong dili komportable.
Gidakop ang 13 ka indibidwal lakip ang tigdumala sa center ug mga caregiver, ug giakusahan sa paglapas sa balaod kalabot sa pagpangabuso sa mga bata. Daghan pa ang giimbestigahan aron matino ang ilang kalabotan sa insidente.
Sa pagkakaron, gipasirado na ang daycare center ug gipahigayon ang tabang medikal ug psychological sa mga bata ug sa ilang mga ginikanan aron makatabang sa ilang pag-recover.
Photo Courtesy: The Strait Times
