Nagbangga ang duha ka tren sa dakbayan sa Bekasi, Indonesia duol sa kaulohan sa Jakarta nga miresulta sa pagkamatay sa upat ka mga indibidwal ug 38 ang naangol, sa milabayng gabii.
Nahitabo ang aksidente sa Bekasi rail station diin nalambigit sa disgrasya ang usa ka commuter line train ug usa ka long-distance train.
Gikumpirma sa railway operator sa Indonesia nga upat ang kumpirmadong patay samtang 38 pa ang gidala sa mga duol nga ospital.
Nagpasidaan ang mga otoridad nga posible pang mosaka ang gidaghanon sa mga biktima tungod kay nagpadayon pa ang rescue operations.
Sumala sa mga report, gibanabanang unom hangtod pito ka tawo pa ang naipit sulod sa mga bagon, maong padayon ang pagputol sa rescue team sa mga puthaw nga parte sa tren aron maluwas ang uban pa.
Kalabotan usab niini, gipahigayon na usab sa Jakarta Police ang imbestigasyon aron mahibal-an ang hinungdan sa panagbangga.
Nakita usab ang dili moubos sa 20 ka ambulansya sa lugar sa insidente, samtang nagtabang ang mga rescuer gikan sa national disaster ug rescue agencies sa pag-evacuate sa mga pasahero.
Photo Courtesy: DW.com
