Gihatagan og pagtagad ang pipila ka mga personalidad sa industriya sa showbiz ug social media nga aktibong nagpalambo ug nagpasikat sa pagkaon nga Pinoy atol sa kasaulogan sa “Kalutong Pilipino.” Usa na niini si Judy Ann Santos, nga nailhan isip “Queen of Pinoy Soap Operas.”
Gawas sa iyang kalampusan sa pag-artista, napakita usab niya ang iyang abilidad sa pagluto. Sa tuig 2006, nagskwela siya sa Center for Asian Culinary Studies ug nakagradwar nga adunay honors. Ang iyang bana nga si Ryan Agoncillo, misunod usab sa iyang hilig, hinungdan nga nahimong dako nga bahin sa ilang pamilya ang pagluto.
Samtang si Marvin Agustin, usa usab sa mga artista nga nahimong malampuson sa culinary world. Gikan sa pagka-aktor, nakab-ot niya ang dungog isip chef ug negosyante. Nailhan siya sa iyang eksperto sa cochinillo ug modernong lutong Pinoy nga naghiusa sa tradisyon ug bag-ong pamaagi.
Gipadagan niya ang nagkadaiyang food businesses sama sa MARVIN Kitchen & Bakeshop ug Cochi, diin iyang gipakita ang kahimtang sa Filipino comfort food sama sa sinigang ug pork binagoongan nga iyang gi-level up gamit ang modernong teknik.
Sumala sa mga eksperto, dako ang papel sa mga personalidad sama nila sa pagpreserba ug pagpalambo sa kultura sa pagkaon sa Pilipinas, ilabi na sa pagpasikat sa lokal nga lami ngadto sa mas halapad nga merkado.
