Nisaka karon ang bayranan sa kuryente sa Pilipinas, bisan pa man nga daghang nasod sa kalibutan ang nagpatuman og pagkunhod sa buhis sa enerhiya aron mapagaan ang epekto sa global energy crisis.
Base sa report, dul-an sa 39 ka ekonomiya ang nagpaubos sa energy taxes, ilabina sa Europa, aron matabangan ang ilang mga konsumidor. Apan dinhi sa nasod, padayon gihapon ang pagsaka sa bayranan sa kuryente tungod sa mahal nga generation cost, buhis, ug ubang charges nga apil sa billing.
Sumala sa Manila Electric Company, ang kompanya nagsilbi lamang nga collection agent sa maong mga bayranan ug dili kini apil sa ilang kita.
Gipasabot usab nga ang bayranan sa kuryente naglakip sa 12% VAT ubos sa National Internal Revenue Code, universal charge ubos sa Electric Power Industry Reform Act, ug ubang policy-driven charges sama sa Feed-in Tariff ug subsidies alang sa mga kabus nga sektor.
Samtang nagkataas ang gasto, adunay mga konsumidor nga nangutana sa hustisya sa ubang charges, ilabina sa cross-subsidies sama sa lifeline rate alang sa low-income households ubos sa Republic Act 11552.
Sa laing bahin, nanawagan si Senadora Risa Hontiveros sa full refund sa giingong overcollections sa kuryente nga mahimong moabot og P100 bilyon, bisan pa man nga ang aprubadong refund karon ipanghatag sulod sa 12 ka bulan sugod sa Mayo.
Samtang ang ubang nasod naghatag og mas lapad nga tax cuts ug subsidies, nagpabilin nga limitado ang mga lakang sa gobyerno sa Pilipinas, lakip ang pipila ka pagkunhod sa fuel cost nga gimando ni Pangulong Ferdinand Marcos Jr.
Sa pagkakaron, padayon ang pagtaas sa bayranan ug ang mga konsumidor ang nagpas-an sa dugang nga gasto sa ilang adlaw-adlaw nga panginabuhi.
Photo Courtesy: Balita
