Nasunog ang unom ka heavy equipment human kini gisunog sa tulo ka wala mailhing armadong lalaki, alas 9:21 sa gabii, sa Purok 3, Barangay Danao, dakbayan sa Surigao.
Sa gipadangat nga impormasyon ni PLTCOL. ATTY. Mariano Lukban, Hepe sa Surigao Component City Police Station nakadawat sila sa report kabahin sa insidente hinungdan nga dali nila kining girespondihan ang panghitabo.
Gikompirma ni Lukban nga tulo ka units sa heavy equipment ang nadamyos—duha ka backhoe ug usa ka elf truck—ang totally nga nasunog, samtang duha pa ka units nga road roller ug cement mixer ang partially nga nadaot tungod sa sunog.
Base sa inisyal nga imbestigasyon, ang watchman nga si Maijel Estebe Doquila, 49-anyos, ulitawo ug residente sa Purok 2, Barangay Danao, misaysay nga bandang alas 7:30 sa gabii, adunay tulo ka wala mailhing lalaki nga miabot sakay sa usa ka pula nga RUSI nga motorsiklo kinsa nga naka-bonet ug armado sa wala masayring kalibre sa armas.
Samtang ang duha ka suspek ang nakig-istorya kaniya, og ang usa miduol sa lugar diin gipark ang mga heavy equipment ug didto gituohang gipangsilaban sa kalayo. Human sa insidente, ang mga suspek daling misibat padulong sa barangay proper sakay gihapon sa maong motorsiklo.
Segon sa tigbantay nga wala siyay nahimo aron pugngan ang mga suspek tungod sa kahadlok, ilabina kay gipahimangnoan pa siya nga dili mosumbong sa mga otoridad.
Base sa impormasyon, ang mga nasunog nga heavy equipment gipanag-iyahan sa usa ka MIGO Construction firm nga nakabase sa Cotabato City.
Sa pikas nga bahin, ang mga nasunog nga kagamitan gigamit sa konstruksyon sa dalan padulong sa Barangay Mat-i sa dakbayan.
Padayon pa ang imbestigasyon sa mga otoridad aron mailhan ug madakpan ang mga responsable og masayran ang motibo sa maong insidente.
