Miabot na sa Japan ang unang kargamento sa crude oil gikan sa United States isip alternatibong suplay human sa tensyon ug pag-atake sa US batok sa Iran sa ulahing bahin sa Pebrero.
Ang tanker nga nagdala og 910,000 ka bariles miabot sa Tokyo Bay, taliwala sa kabalaka sa suplay tungod sa de facto blockade sa Strait of Hormuz—usa sa pinakaimportanteng agianan sa oil shipment sa kalibotan.
Bisan pa man, ang gidaghanon sa giangkat kulang pa para sa usa ka adlaw nga konsumo sa Japan hinungdan nga nagdali ang gobyerno sa pagpangita og dugang suplay gawas sa Middle East.
Ang barko nga nagdala og krudo mibyahe gikan sa Texas sa katapusan sa Marso ug miagi sa Panama Canal sulod sa halos usa ka bulan nga biyahe.
Ang krudo iproseso sa refinery sa Cosmo Oil Co. sa Chiba aron mahimong gasolina ug uban pang produktong petrolyo.
Sa pagkakaron, kapin sa 90 porsyento sa oil imports sa Japan gikan sa Middle East, busa gipalig-on niini ang sourcing gikan sa North America ug ubang rehiyon aron masiguro ang lig-on nga suplay sa enerhiya.
Photo Courtesy: PNA
