Nasikop sa kapulisan ang upat ka mga suspek human sa usa ka insidente sa pagpangawat nga nahitabo sa Purok 1, Barangay Poblacion, alas 11:45 sa buntag, Abril 28, 2026. Ang mga nadakpan giila nga sila si alyas Aby nga taga Sta. Cruz, alyas Ian ug alyas Ran2 nga parehong taga Toril, Davao City, ug si alyas Cindy nga taga Digos City.
Sumala sa report, ang tag-iya sa Julie’s Store maoy mihangyo dayon og tabang sa pulisya human masuta nga gikawatan ang ilang tindahan.
Dali usab mitubag ang mga operatiba sa Sulop Municipal Police Station (MPS) nga gipangulohan ni PCPT Ronald D. Ditan, Officer-in-Charge.
Sa pagtan-aw sa CCTV footage sa establisyemento, nakita ang tulo ka indibidwal nga nagtinabangay sa pagpangawat og nagkalain-laing grocery items ug dayong mikalagiw sakay sa usa ka gray nga Mitsubishi Mirage.
Gipahigayon dayon ang dragnet operation sa koordinasyon sa Davao del Sur Police Provincial Office ug uban pang duol nga police units.
Na-intercept ang sakyanan sa mga suspek didto sa Baluyan Border Control Point sa Barangay Bolton, Malalag, pinaagi sa hiniusang paningkamot sa Regional Mobile Force Battalion (RMFB) 11 ug 12.
Giila dayon ang mga suspek ug gidakop. Gipahibalo usab sila sa rason sa ilang pagdakop ug sa ilang katungod ubos sa Miranda Doctrine sa pinulongan nga ilang nasabtan. Narekober gikan sa mga suspek ang mga gikawat nga butang nga gibanabanang kantidad nga mokabat og Php6,000.
Gidala ang mga suspek ug ebidensya sa Sulop MPS alang sa hustong dokumentasyon. Samtang sa karon giandam na ang kaso batok sa mga suspek nga ipasaka sa Office of the Provincial Prosecutor.
