Mibalik sa spotlight ang “Queen of R&B” nga si Kyla human mulanog pag-usab ang iyang klasikong kanta nga Hanggang Ngayon, nga nahimong viral sa social media tungod sa paggamit niini sa content creator nga si Johnmark Gon.
Ang maong kanta, nga unang gipagawas pa niadtong 2000s, nakab-ot og bag-ong kinabuhi human kini gigamit sa mga parody ug comedic videos ni Gon, nga nakahatag og bag-ong interpretasyon sa orihinal nga emosyonal nga tema niini.
Sumala sa singer, nalipay siya nga ang kanta mibalik sa kasikat bisan pa sa pagbag-o sa paggamit niini. Niingon siya nga “nakakakilig” nga human sa kapin 26 ka tuig, nabanhaw pag-usab ang “Hanggang Ngayon” ug nakaabot pa sa lain-laing nasud sama sa Portugal, Brazil, Spain, ug uban pa.
Giangkon ni Kyla nga aduna siyay “mixed feelings” tungod kay ang kanta nga orihinal nga usa ka hugot o sakit nga awit nahimong parody ug good vibes content. Apan alang kaniya, positibo gihapon kini tungod kay naghatag kini og kalipay sa bag-ong henerasyon.
Ang “Hanggang Ngayon,” nga gisulat ni Arnie Mendaros ug gipagawas isip kabahin sa unang album ni Kyla niadtong 2002, dugay nang nailhan isip usa sa pinakasikat nga OPM love songs nga puno sa emosyon ug vocal complexity.
Sa pagkakaron, nagpadayon ang global reach sa kanta samtang padayon usab nga nadani ang mas batan-ong audience usa ka kamatuoan nga ang musika ni Kyla nagpabiling relevant bisan pa sa paglabay sa panahon.
PHOTO COURTESY: Philippine Star
