Nagpahibalo ang Department of Energy (DOE) nga ang pagsaka sa presyo sa petrolyo sa Pilipinas tungod sa gubat tali sa US-Israeli forces ug Iran posibleng molungtad hangtod sa katapusan sa 2026.
Sumala ni Rino Abad, naglisod gihapon og agi ang mga oil tanker sa Strait of Hormuz tungod sa naval blockade, bisan pa sa giingong ceasefire.
Matod niya, kung maibalik ang normal nga paglabay sa mga barko, dako ang posibilidad nga moubos ang presyo sa petrolyo. Apan kung walay long-term peace agreement, magpadayon ang volatility sa merkado.
Misaka ang global oil prices sukad sa opensiba sa US ug Israel batok sa Iran niadtong Pebrero, nga misangpot sa mga airstrike ug kadaot sa oil infrastructure. Tungod niini, naapektuhan ang suplay sa kalibotan.
Sa Pilipinas, milapas na sa Php100 kada litro ang presyo sa fuel tungod sa pagsalig sa imported nga petrolyo.
Aron masulbad ang epekto, nagpadayon ang Philippine National Oil Company (PNOC) sa pagpalit og fuel reserves sama sa diesel ug LPG. Gipalapad usab sa gobyerno ang Php10 kada litro nga diskwento sa diesel alang sa public utility vehicles sa tibuok nasud.
Gisiguro usab sa DOE nga adunay kontrol sa price adjustments aron malikayan ang overpricing, bisan dili mapugngan ang global price movements.
Photo Courtesy: GMA
