Nakadawat sa kinatibuk-ang ₱100,000 cash incentive ang usa ka centenarian didto sa lungsod Impasug-ong ning bag-o lang. Gitunol mismo nila Governor Rogelio Neil P. Roque ug Impasugong Mayor Mai Okinlay ang maong kantidad kang Tatay Sulpicio Jamisola, Sr., sa edad nga usa ka gatus ka tuig kinsa nagpabilin nga simbolo sa kalig-on ug kaalam sa usa ka komunidad.
Kini nahimong benepisyaryo sa programang Provincial Centenarian, kinsa giila dili lamang tungod sa iyang taas nga kinabuhi, kundili usab sa iyang papel sa pag-amuma sa pamilya ug sa paghatag inspirasyon sa sunod nga mga henerasyon.
Nasayrang kabahin ang insentibo sa paningkamot sa Provincial Government of Bukidnon aron pasidunggan ang mga senior citizens, ilabina ang mga centenarian nga nagbilin ug mahinungdanong panulondon sa komunidad.
Sumala ni Mayor Okinlay, ang maong programa usa usab ka paagi sa pagpakita sa pasalamat ug suporta sa mga katigulangan, kung diin sa ilang lungsod gipalig-on usab kini sa lokal nga balaodnon nga giilang LGU Impasugong Milestone Benefit.
Dako ang pasalamat sa pamilya sa centenarian sa maong pag-ila ug paghatag pahalipay, nga usa ka dakong tabang, ilabina sa iyang panginahanglan.
Nagpamatuod ang maong inisyatibo nga ang gobyerno padayon sa pag-atiman sa tanang sektor—gikan sa kabataan hangtod sa mga katigulangan—nga nagpadayon sa paghulma sa kaugmaon sa Bukidnon
Photo Courtesy: LGU-Bukidnon
