Patay ang usa ka 75-anyos nga lalaki nga bedridden senior citizen samtang ang iyang 72-anyos nga asawa nakaangkon og grabeng paso sa lawas human maugdaw ilang balay niadtong Abril 26, 2026, alas 9:00 sa gabii sa P-1, Barangay Poblacion, Kadingilan.
Sa dihang gisulod sa mga bombero ang nasunog nga panimalay, ilang nadiskobrehan ang patayng lawas sa lalaki sulod niini samtang ang asawa sa biktima nakaangkon og second-degree burns kinsa giluwas sa mga silingan ug dayon gidala sa Kibawe Provincial Hospital alang sa dinaliang tambal.
Sa esklusibong pakighinabi sa Juander Radyo Malaybalay, kang FO3 Arvin M. Fabrigas, OIC-Chief Fire Arson Investigator sa Kadingilan Fire Station, mibutyag nga usa sa ilang gitan-aw nga anggulo sa niini ang “unattended lighted candle” nga posibleng nagsugod sa sulod sa kwarto sa mga biktima.
Ang balay adunay gidak-on nga 37 square meters ug ginama sa light materials hinungdan paspas mikatag ang kalayo diin gibanabana nga miabot sa ₱56,250 ang kinatibuk-ang danyos sa kabtangan
Gikumpirma sa kapulisan ug BFP nga aksidente ang insidente ug walay nakitang foul play ug giklaro usab nga wala kini kalabutan ang sunog sa El Niño o grassland fires sa lugar.
Photo Courtesy: Kadingilan Municipal Police Station
