Nagpatabang ang Provincial Agriculture’s Office (PAgrO) sa Provincial Indigenous Peoples Mandatory Representative (IPMR) aron matubag ang bug-at nga silot nga gipaabot sa pito ka tribu sa Bukidnon human sa kontrobersyal nga Kaamulan 2026 Lechon Festival.
Gihangyo ni PAgrO Head Dr. Emma Ravelo si Bukidnon IPMR Datu Makayuba Renato Sumbongan nga mobarog isip “Datu nga magdepensa” aron makunhuran ang gipangayo nga hatagon sa mga tribal leaders nga gitawag og “Hapuhap sa Ginhawa” o pamaagi sa pag-ayo sa relasyon.
Lakip sa gipangayo sa pito ka tribu ang pito ka kabaw kung asa usa alang sa matag tribu—uban ang walo ka manok ug usa ka baboy isip simbolo sa paghugas sa kasaypanan.
Sumala kang Ravelo, dili makaya sa ilang buhatan ang maong mga gipangayo tungod sa kadako sa gasto. Iyang gipahayag nga ang tuyo sa Lechon Festival mao lamang ang pagpalambo sa industriya sa baboy sa probinsya ug pagpamatuod nga luwas ang Bukidnon gikan sa African Swine Fever (ASF).
Sa pagkakaron, nangayo og konsiderasyon ang PAgrO ug naglaum nga pinaagi sa pag-apil sa IPMR, makab-ot ang usa ka mas gaan nga kasabutan tali sa kagamhanan ug mga lider sa tribu aron masulbad ang isyu
Photo courtesy: NCIP – Bukidnon
