Nakadani og daghang kostumer ang usa ka gitawag nga “android waitress” sa Chongqing, China tungod sa iyang hapsay ug eksaktong robotic nga lihok sulod sa usa ka restawran. Daghang bisita ang nabilib sa iyang estilo sa paglihok ug pag-atiman sa kostumer nga mura’g usa ka tinuod nga humanoid robot.
Sa mga video nga mikaylap online, makita nga ang waitress makahimo sa pagdawat og order, paghatod og pagkaon ug ilimnon, ug pakig-interact sa mga bisita nga daw makina ang lihok. Apan, adunay pipila nga netizens ang nakulbaan o na-creepyhan, nga ilang giingong resulta sa uncanny valley effect—kung diin ang usa ka butang nga hapit na kaayo mahimong tawo makahatag og dili komportable nga pagbati.
Bisan pa sa mga reaksyon, nahimong viral ang maong waitress ug nakadani og daghang tawo nga gustong makakita sa personal. Daghang media outlets ang miadto sa restawran aron susihon kung tinuod ba nga robot ang nagserbisyo.
Sa ulahi, napamatud-an nga dili diay kini robot kondili usa ka tinuod nga tawo—usa ka dancer nga giila nga si Miss Qin, 26-anyos.
Siya ang nagpakaaron-ingnon nga android, nga maoy hinungdan sa kalit nga pagdagsa sa kostumer ug interes sa publiko.
Photo Courtesy: China Morning Post
