Girehistro ni Indigenous Peoples Mandatory Representative kon IPMR Roberto Cabaring ang iyang hugot nga pagsupak sa House Bill 621 kon “An Act Rationalizing the Ancestral Lands Administration and Adjudication Process” atol sa regular nga sesyon kagahapong adlawa.
Kung mahinumduman ang House Bill 621 nga giduso sa House of Representatives, nagtumong nga ibalhin ang awtoridad sa pagparehistro ug pagdumala sa yutang kabilin gikan sa National Commission on Indigenous Peoples (NCIP) ngadto sa Department of Environment and Natural Resources (DENR).
Sumala pa ni Datu Cabaring nga naghiusa ang mga lumad sa Cagayan de Oro sa pagsupak niini nga balaudnon tungod sa ilahang pagduda nga kini posibleng pagpangilad lamang sa mga tribu aron nga makontrol ang ilahang ancestral domain ug mawad-an silag katungod diha sa ilahang yutang kabilin.
Lakip na diha ang ilahang kabalaka nga maangkon sa pipila ka pribadong indibidwal ug bisan mga politko ang ilahang kayutaan kung asa pahimuslan ang nagtunhay nga mga bahandi ug natural nga rekurso nga posibleng makaguba pa sa kinaiyahan.
Tungod niini, gihangyo ni Cabaring ang Konseho nga tugutan siyang magpahigayon og committee meeting aron nga makakapangayo og komento ug tambag labi na sa NCIP, NGOs, ubang mga ahensya sa gobyerno ug duha ka mga kongresista sa Cagayan de Oro.
Ginaulam sab nga suportahan sa Konseho ang pagpasa og resolusyon nga musupak sa House Bill 621 samtang padayon ang deliberasyon niini sa ubos balay balauranan.
Photo courtesy: Cagayan de Oro City Council
