Nagpagawas og advisory memorandum ang Regional Disaster Risk Reduction and Management Council (RDRRMC) Region 10 bahin sa mga angay buhaton sa publiko ug mga ahensya sa gobyerno atol sa umaabot nga warm ug dry season.
Gipasidaan sa buhatan ngadto sa publiko nga likayan ang dugay nga pagpabilin sa gawas tali sa alas 10:00 sa buntag hangtod alas 4:00 sa hapon, ug magsul-ob og gaan nga sinina ug maggamit og kalo aron malikayan ang epekto sa kainit.
Matod ni Fernando Vincent Dy, Provincial DRRM Officer sa Misamis Oriental, nga ubos sa mandato i-activate ang ilang preparedness protocols, siguruhon ang kaandam sa medical services, ug susihon ang kahimtang sa mga cooling equipment.
Saysay ni Dy nga matag indibidwal, planohon ang mga lakaw ug balansihon ang kahimtang sa mga out-door activities. Dugang pa, gikinahanglan ang padayon nga monitoring sa sitwasyon ug paghatag og report pinaagi sa mga opisyal nga email address o sa 24/7 operations hotline sa PDRRMO.
Gilauman nga pinaagi sa mga lakang, mapanalipdan ang kahimsog ug kaluwasan sa publiko batok sa grabeng kainit.
Photo courtesy: Misamis Oriental-PROVINCIAL Disaster RISK Reduction & Management Office
