Nadakpan ang usa ka giingong street-level drug personality nga nailhan lang sa alyas nga “Toto” atol sa gikasang buy-bust operation nga gipahigayon sa kapulisan sa San Agustin, Surigao del Sur.
Nahimong malampuson ang operasyon niadtong nakalabay nga adlaw sa Purok 1, Barangay Salvacion nga pinangulohan sa San Agustin Municipal Police Station ubos sa pagpanguna ni Police Captain Val Adrian Eigen R. Tumulak, ug sa koordinasyon sa PDEA.
Ang nahisgutang suspetsado usa ka bag-ong giila nga street-level drug personality sa maong lugar.
Human sa pagkasikop, gipahigayon gilayon ang legal nga pagpangita o search nga adunay presensya mismo sa suspek, uban sa mga testigo nga si Barangay Kagawad Greggy Pontillo Lozada.
Sumala sa kapulisan, nagpadayon ang ilang kampanya batok sa ilegal nga droga aron masiguro ang kaluwasan ug kahapsay sa komunidad, ug ang nahisgutang suspetsado gikatakdang mag atubang ug kaso sa kalapasan Republic Act 9165 kon Comprehensive Dangerous Drugs Act of 2002.
Photo courtesy: San Agustin MPS
