Patay ang duha ka lalaki, samtang samaran ang usa ka babaye human sa duha ka managlahing insidente sa pagpamusil nga natigayon sa lungsod sa Quezon ug Don Carlos, Bukidnon niadtong Abril 10 ug 11, 2026.
Sa Quezon, patay ang usa ka 39-anyos nga motorista human giatangan ug gipusil sa duha ka wala mailhing suspetsado gamit ang .45 ug 9mm nga pistola, samtang sa Don Carlos, patay usab ang usa ka 46-anyos nga bana ug naangol ang iyang asawa human sila gipusil sa wala pa mailhing suspetsado samtang nangandam sa ilang trabaho sa sayong kabuntagon.
Gibutyag sa pakighinabi sa Juander Radyo Malaybalay ngadto ni Police Captain Shela Joy Hangad, Spokesperson sa Bukidnon PPO, nga narekober ang 14 ka basiyo sa bala sa dapit sa krimen sa Quezon, samtang duha ka fired cartridge cases usab ang nakuha sa Don Carlos
Gideklarang dead-on-arrival ang biktima sa Quezon tungod sa daghang samad pinusilan sa lawas, samtang ang asawa sa biktima sa Don Carlos anaa na sa luwas nga kahimtang sa hospital kinsa napusilan sa paa ug hawak.
Padayon pa ang lawom nga imbestigasyon sa kapulisan sa maong duha ka lungsod aron matino ang tinuod nga motibo sa mga pagpamatay pinaagi sa ballistic examination sa mga ebidensya aron mailhan ang mga suspetsado.
Gipasabot ni Captain Hangad nga kini mga “isolated incidents” ug iyang gipasalig sa publiko nga gihimo sa mga otoridad ang tanang lakang alang sa dinaliang pagsulbad sa kaso, dungan sa panawagan nga andam ang kapulisan sa pagtabang sa bisan unsang panahon sa emerhensya
Photo Courtesy: Bukidnon Police Provincial Office
