Nagdesisyon si Ferdinand Marcos Jr. kagahapong adlawa Abril 13, kung suspendihon ba o pagamyan lamang ang excise tax sa mga produktong petrolyo, sumala sa Malacañang. Ang maong lakang gihimo aron matubag ang pagsaka sa presyo sa krudo sa kalibutan ug aron maibanan ang gasto sa mga konsyumer.
Ang desisyon mahimong ipatuman pinaagi sa emergency powers nga gihatag sa Republic Act No. 12316, nga nagsugod og bisa human sa 15 ka adlaw nga publikasyon sa Official Gazette.
Nakasumite na ang Development Budget Coordination Committee (DBCC) og rekomendasyon ngadto sa Presidente, nga naglangkob sa posibleng pagkunhod o pagsuspinde sa excise tax sa gasolina, diesel, LPG, ug uban pang fuel products.
Bisan pa sa potensyal nga pagpaubos sa presyo sa lana nga mahimong mokunhod og mga Php6 kada litro sa diesel ug Php10 kada litro sa gasolina ug LPG nagpahimangno ang Department of Finance nga ang hingpit nga pagsuspinde sa excise tax gikan Mayo hangtod Disyembre mahimong mosangpot sa kapildihan sa kita sa gobyerno nga mokabat sa Php136 bilyon.
Nag-awhag usab ang ubang sektor sa pagsuspinde sa 12 porsiyentong value-added tax (VAT), apan giingon sa mga ekonomista nga kini mahimong makapalapad sa national deficit hangtod sa gibanabanang P360 bilyon.
Sumala sa balaod, mahimo lamang ipatuman ang suspension o reduction sa excise tax sulod sa tulo ka bulan matag higayon ug dili molapas sa usa ka tuig sa kinatibuk-an, samtang ang awtoridad sa Presidente sa paggamit niini magpadayon lamang hangtod Disyembre 31, 2028.
Photo Courtesy: President Ferdinand R. Marcos Jr. (Screengrab from RTVM)
