Gipangandaman na karon sa City Disaster Risk Reduction and Management Office (CDRRMO) Malaybalay ang posibleng epekto sa El Niño phenomenon pinaagi sa pagpahigayon og Information, Education, and Communication (IEC) campaign aron mapahibalo ang publiko mahitungod sa mga risgo sa grabeng kainit.
Nakig-alayon na ang maong buhatan sa Office of the City Agriculturist ug uban pang mga departamento alang sa usa ka pre-disaster meeting sunod semana aron plantsahon ang mga preparedness programs ubos sa pagtugot ni Mayor Warren Pabillaran.
Sumala pa sa pakighinabi sa Juander Radyo Malaybalay ngadto ni Mr. Allan J. Comiso head sa sa CDRRMO Malaybalay nga prayoridad nila ang paghatag og mga advisory sa komunidad tungod sa mga hagit nga dala sa ting-init, ilabi na sa sektor sa agrikultura diin dako ang posibilidad nga maapektuhan ang mga pananum sa mga mag-uuma.
Gawas sa panginabuhian, gitahasan usab ang publiko nga magmabinantayon sa mga sakit nga sagad motumaw panahon sa El Niño, sama sa airborne diseases, heat stroke, ug pag-atake sa alta presyon o high blood
Isip kabahin sa ilang mga pahimangno, giawhag sa CDRRMO ang matag usa sa pagsiguro sa saktong hydration pinaagi sa pag-inom og daghang tubig ug pagdala og payong kon mugawas sa panimalay.
Girekomendar usab ang paglikay sa direktang pagbulad sa init sa adlaw aron malikayan ang bisan unsang komplikasyon sa panglawas samtang nagpadayon ang pagsaka sa temperature
Photo Courtesy: CDRMO Malaybalay
