Misurender na ug mapahiubsanon nga nangayo’g pasaylo ang duha ka lalaki human sila mailhi sa nagviral nga video sa pagpangulata didto sa usa ka convenience store sa Barangay San Jose, Malaybalay City.
Giila ang mga suspetsado sila Jhon Paul ug Antonio, parehong taga barangay Patpat sa dakbayan samtang midangop sila ngadto kang Sherwin nga taga San Fernando, kinsa maoy biktima sa insidente—uban ang ilang ginikanan aron atubangon ang nahitabo.
Gipahigayon ang pag-atobang sa opisina ni Malaybalay City Councilor Jason Chad Ayala adlaw’ng Biyernes, Abril 10, diin nagkasinabot ang duha ka kampo pinaagi sa usa ka pormal nga kasulatan kansang duha ka suspetsado mobayad og ₱43,750 isip kompensasyon sa samad, kawad-on sa trabaho sulod sa 15 ka adlaw, ug dugang gastohon sa medikal nga pagpa-checkup sa biktima.
Sumala sa konsehal, ang dali nga pagsulbad sa kaso nahimo tungod sa viral nga video nga mikatap sa social media ug sa kooperasyon sa publiko pinaagi sa iyang “Bring Me” nga panawagan.
Gipasidan-an usab niya ang duha nga adunay posibilidad nga mapasaka sa korte ang kaso kung mapakyas sa pagtuman sa ilang kasabutan.
Photo Courtesy: Jason Chad Ayala
