Giaksyonan dayon ang Bureau of Fisheries and Aquatic Resources (BFAR) sa pagtabang sa mga mangingisda sa lungsod sa Bulan, Sorsogon nunot sa gikatahong oversupply sa isda nga tamban.
Matod sa imbestigasyon sa ahensya, tungod sa temporaryong pagsuspenso sa operasyon sa unom ka fish processing plants sa probinsiya atol sa pag-obserbar sa Semana Santa usa sa mga hinungdan sa pagbaha sa suplay sa maong mga isda.
Tungod sa paghunong sa mga operasyon, limitado ang mga negosyante sa ilang abilidad sa pagpalit sa tonelada nga mga isda gikan sa lokal nga mga mangingisda.
Paspas nga nakig-alayon ang BFAR sa mga lokal nga kagamhanan ug mga stakeholders sa industriya, aron dili masayang ang mga isda ug maluwas ang lokal nga panginabuhian.
Gipangunahan karon sa ahensya ang pag-focus sa pagpalig-on sa sistema sa distribution aron ibaligya ang sobrang isda sa lainlaing mga merkado sulod sa nasud.
Dugang pa, isip usa ka long-term nga solusyon, ang gobyerno nagsugod na usab sa paghatag ug dugang pagbansay sa mga mangingisda sa alternatibong pagproseso sa ilang mga kuha.
Diin gigiyahan sila unsaon paghimo og tinapa ug bagoong aron motaas ang bili sa ilang mga produkto ug makatabang sa ilang panginabuhian.
Sa pikas bahin, gikompirma usab sa BFAR nga ang mga canneries sa probinsiya na-ablihan na usab ug normal na nga nakadawat og bulto-bulto nga isda.
Gilauman sa mga buhatan nga ang pagpabalik sa operasyon sa mga pabrika sa makahatag og kalig-on sa presyo ug suplay sa tamban, ug mapugngan ang laing insidente sa oversupply.
Photo Courtesy: ABS-CBN
