Naaprobahan ang Supplemental Budget No. 1 (SB1) alang sa Local Disaster Risk Reduction and Management Fund (LDRRMF) sa Malaybalay City.
Kini ang gikabutyag ni CDRRMO Head Allan J. Comiso atol sa milabay nga media forum diin ang kinatibuk-ang pundo nagkantidad og Php40, 899,376.89 gigahin aron mas mapalig-on ang pagpangandam sa syudad batok sa mga kalamidad ug uban pang dinaliang panginahanglan sa komunidad.
Dugang pa niya, ubos sa maong budget, gibahin kini sa duha ka dagkong bahin: ang 70% o Php28,629,557.52 alang sa mga programa ug proyekto sa pagpangandam (Preparedness Fund), samtang ang 30% o Php12,269,810.00 magsilbing Quick Response Fund (QRF).
Giplano sab ni City Mayor Jay Warren Pabillaran nga mogahin og Php8 milyon alang sa fuel reservation isip pagpangandam sa padayon nga pagsaka sa presyo sa lana ug posibleng krisis sa enerhiya.
Sa pagkakaron, nakig-alayon pa ang lokal nga kagamhanan sa Legal Office, OCD, ug DILG aron masiguro nga subay sa balaod ug sa Executive Order No. 110 ang paggamit sa maong pundo sa dili pa hingpit nga ipatuman
Photo Courtesy:LGU Malaybalay
