Hugot nga gipahinumdom sa lokal nga kagamhanan sa Malaybalay nga ang bisan unsang porma sa treasure hunting ug gold mining nagpabiling ginadili sa dakbayan, taliwala sa mga report sa ilegal nga pagpangubkob ug ang deklarasyon sa pipila ka dapit isip “Minahang Bayan.”
Matod ni City Environment and Natural Resources Office (CityENRO) Head Jessie Suson, gibutyag sa opisyal nga duna nay giimbestigahan nga insidente sa treasure hunting sa Barangay San Jose diin dunay nahitabong pagpangubkob sa ilalom mismo sa dalan.
Tungod kay supak kini sa balaod, ug kini giduso na ngadto sa DENR alang sa dinalian nga adjudication proceeding batok sa mga sad-an. Ang City ENRO ug DENR personal na usab nga mibisita sa maong dapit aron masusi ang kadaut
Gawas sa legal nga aspeto, dako usab ang kabalaka sa mga eksperto sa seguridad sa palibot.
Kahibaloang ang pagmina mahimong moresulta sa dagkong landslide, ilabi na nga ang siyudad nailang “high susceptibility” o daling makasinati og pagdahili sa yuta kon mag-ulan.
Sa pagkakaron, nagpabiling baroganan sa siyudad ang pagpanalipod sa kinaiyahan ug ang pagsunod sa “No to Gold Mining” nga palisiya alang sa kaluwasan sa tanang lumulupyo
Photo Courtesy:LGU Malaybalay
