Gibutyag ni City Information Officer Jade Adecer nga karung Abril otso, adlawng Miyerkules ipanghatag ang ₱5,000.00 nga ayuda alang sa kapin kon kulang 1,500 ka rela drivers sa Dakbayan, nga pagahimuon sa City Hall Quadrangle.
Alayon niini, gipahibalo ni Adecer nga gawas sa singko mil matag rela driver gikan sa DSWD, mohatag usab og dugang ₱2,000.00 nga ayuda matag rela driver si Mayor Klarex Uy, diin mokabat na sa ₱7,000.00 tanan ang madawatan sa matag benepisyaryo.
Magsugod ang ayuda payout sa alas otso sa buntag ug mahuman sa alas singko sa hapon. Pagahimuon sa City Hall Mini Park ang verification ayha modiretso sa quadrangle alang sa releasing sa kwarta.
May kalambigitan niini nga balita, kapin sa 9,000 ka mga tricycle drivers gikan sa walo ka highly urbanized cities sa Region 10 ang mahatagan og ayuda gikan sa programa sa gobyerno karong Abril otso, diin matag usa makadawat og ₱5,000.
Sumala pa ni Department of Social Welfare and Development 10 Regional Director Glofelia Uayan nga mokabat sa ₱49 milyon ang total nga pondo alang niini nga payout, nga gitumong aron matabangan ang mga driver sa ilang adlaw-adlaw nga panginabuhi.
Gikinahanglan nga adunay valid driver’s license ug uban pang requirements ang mga benepisyaryo aron makadawat sa ayuda. Giawhag usab ang mga driver nga wala pa maka-renew sa ilang lisensya nga magpa-renew aron dili maapektohan ang ilang kwalipikasyon sa programa.
Photo courtesy: doctrine.com
