Nisurender sa kapulisan ang suspek sa “gas and run” nga insidente sa Balintawak, Quezon City niadtong nakalabay nga adlaw. Sumala sa kapulisan, miadto mismo ang suspek sa La Loma Police Station 1 niadtong Lunes sa gabii aron atubangon ang reklamo batok kaniya.
Matod pa sa pulis, naila ug natultulan nila ang suspek pinaagi sa backtracking. Nakatabang usab ang tag-iya sa sakyanan nga iyang gigamit, nga maoy nakigstorya sa driver aron ipa-surrender kini ug moatubang sa mga awtoridad.
Sa iyang depensa, giingon sa suspek nga usa siya ka TNVS driver ug naglisod na sa kinabuhi tungod sa kamahal sa gasolina ug hinay nga kita sa pasada. Miingon siya nga gamay na lang kaayo ang iyang kita matag adlaw, maong napugos siya sa pagbuhat sa maong aksyon.
Nangayo usab siya og pasaylo ug misaad nga dili na kini mausab. Mag-atubang ang suspek sa kasong estafa tungod sa gibuhat niini nga pagsibat sa gasolinahan human kini nagpa-full tank sa iyahang gi-drivan nga sakyanan.
Photo Courtesy: GMA News
