Opisyal nga gipili sa National Electrification Administration (NEA) niadtong Marso 30, 2026, si Mr. Nollie B. Alamillo isip Executive Officer sa South Cotabato II Electric Cooperative, Inc. (SOCOTECO II) isip hulip kay OIC General Manager Atty. Cherry Joie Lima-Ponce.
Kini nga lakang gihimo human makit-an sa gipahigayong special audit ang seryosong mga isyu sa operasyon ug panalapi sa kooperatiba, lakip na ang pag-ubos sa rating niini gikan sa AAA ngadto na sa Category B. Gani, ang Board of Directors sa SOCOTECO II mismo ang pormal nga nangayo og tabang sa NEA niadtong Marso 24 tungod sa kakuwang sa transparency ug koordinasyon tali kanila ug sa management sa kooperatiba.
Usa sa pinakabug-at nga nakit-an sa audit mao ang mokabat sa Php 59 milyones nga kinitaan gikan sa “remarketing revenue” sa kuryente nga wala gi-uli sa mga Member-Consumer-Owners (MCOs).
Imbes nga gamiton kini aron paubsan ang bayranan sa kuryente, gibalhin kini sa management ngadto sa ilang General Fund para sa operasyon.
Gawas niini, gikuwestiyon usab ang pagpagawas sa Php 126.08 milyones para sa mortuary benefits sugod niadtong 2016 hangtod 2024, ingon man ang pag-hire og sobra sa 600 ka outsourced personnel nga mas daghan pa kaysa sa ilang regular nga empleyado, bisan pa man sa nagkalisod nga kahimtang sa panalapi sa kooperatiba.
Tungod niining mga anomalya, gitahasan si Mr. Alamillo, kinsa usa ka eksperto sa rural electrification, sa pagdumala sa SOCOTECO II aron masiguro ang operational efficiency ug mapanalipdan ang katungod sa mga konsumidor.
Magpadala usab ang NEA og dugang audit team nga gilangkuban og mga Certified Public Accountants (CPAs) ug mga Engineer aron lalom nga susihon ang mga teknikal ug pinansyal nga aspeto sa kooperatiba.
Gipasalig sa NEA nga ilang paningkamutan nga mabalik sa normal ang serbisyo ug mapalig-on pag-usab ang pagsalig sa publiko sa maong electric cooperative.
