Misaka ngadto sa 62 ka mga nag kalain-laing insidente sa sunog ang natala sa probinsya sa Bukidnon gikan sa Enero hangtod ning kasamtangang bulan sa Marso 2026.
Base sa datos gikan sa Bureau of Fire Protection (BFP), adunay 18 ka sunog niadtong Enero, 16 sa Pebrero, ug mitala sa labing taas nga ihap nga 28 ka insidente karong bulan sa Marso. Tungod niini, gibana-bana nga miabot na sa ₱4.6 ka milyon ang kinatibuk-ang danyos sa maong mga katalagman nga miigo sa nagkalain-laing dapit sa probinsya.
Sa esklusibong pakighinabi sa Juander Radyo Malaybalay ngadto ni SFO1 Rene R. Rubillos, ang Spokesperson Sa BFP Bukidnon iyang giila nga ang nag-unang hinungdan sa maong mga sunog mao ang mga electrical problems sama sa wala na-unplug nga mga appliances, nabiyaan nga pagluto, ug mga kandila.
Gawas niini, dako usab ang nahimong epekto sa grabeng kainit sa panahon nga maoy hinungdan sa pagdaghan sa mga grass fires. Gipahinumdoman sa mga otoridad ang katawhan nga magmabinantayon sa kanunay aron malikayan ang susamang trahedya nga makadaot sa kinabuhi ug kabtangan.
Tungod sa Fire Prevention Month ug sa nagsingabot nga Semana Santa, anaa karon sa heightened alert ang BFP Bukidnon aron mas mapalig-on ang seguridad sa komunidad.
Gipakusgan karon ang programang Oplan Ligtas na Pamayanan pinaagi sa pag-organisa sa mga Community Fire Auxiliary Groups (CFAG) sa matag barangay aron dali nga makaresponde sa bisan unsang emerhensya. Nagpahigayon usab ang buhatan og mga inspeksyon, fire drills, ug pre-fire planning sa mga lugar nga giila nga fire-prone areas aron maseguro ang kaluwasan sa tanan.
Photo Courtesy: BFP- Malaybalay
