Katingalahan ang usa ka panghitabo human usa ka lola sa Shanghai, China nga giilang si Liu, gikapakuratan ang publiko lakip ang pamilya niini human niya gibilin ang iyang katigayonan nga nagkantidad $2.8 million (₱150M+) sa iyang mga binuhing iring ug iro og wala sa kaugalingong mga anak.
Gibutyag ni Liu nga napuno siya sa kahiubos tungod sa pagpasagad sa iyang mga anak nga panagsa ra mobisita kaniya bisan sa panahon sa iyang pagkasakit, samtang ang iyang mga pets lamang ang naghatag kaniya og kahupayan ug kaisog.
Tungod kay dili itugot sa balaod sa China ang direktang pagbalhin sa bahandi ngadto sa mga mananap, ang maong pundo itugyan ngadto sa usa ka veterinary clinic nga maoy gitahasan sa pag-atiman sa maong mga pets ug sa ilang mga kaliwat sa umaabot.
Ang maong hitabo nahimong viral sa tibuok kalibutan ug nagsilbing usa ka mabulokong pahinumdom mahitungod sa bili sa tinuod nga pagpangga ug pagkamaunongon sa sulod sa pamilya.
Photo Courtesy: shutterstock
