Nasikop ang duha ka lalaki nga giingong nangilad sa mga katawhan, gamit ang peke nga gold bars sa gipahigayong police operation sa barangay Poblacion, Quezon, Bukidnon, niadtong nakalabay nga adlaw.
Giila ang mga suspetsado sa mga alyas nga “Jonel,” 29-anyos, ug “Ronie,” 32-anyos, samtang padayong giila ang tulo nila ka mga kauban.
Base sa report, mga alas 4:40 sa hapon, usa ka reklamante ang nidangop sa Quezon Municipal Police Station aron i-report ang transaksyon kalabot sa giingong pagpalit og mga gold bar nga gidudahang peke.
Daling gilunsad ang entrapment operation sa nahisgutang lugar, sa mga operatiba ug nasigpatan ang duha ka mga suspetsado nga sakay sa ilang tagsa-tagsa ka motorsiklo nga gituohang nalambigit sa transaksyon.
Atol sa inspeksyon, nakuha gikan niini ang duha ka peke nga gold bar, duha ka cellphone nga gidudahang gigamit sa mga transaksyon, ug duha ka motorsiklo.
Nakatanggong na ang mga dinakpan sa Quezon Municipal Police Station alang sa tukmang disposasyon samtang giandam na ang pagpasaka og kaso batok sa mga suspetsado.
Photo Courtesy: Quezon Municipal Police Station
