Gamayng utong pa ang gikinanglan sa mga driver ug operator sa mga motorela sa dakbayan sa Cagayan de Oro ayha mapatuman ang dugang pletehan human nga giaprubahan kini sa Konseho sa nilabayng adlaw.
Sumala pa ni Paul Cempron, Presidente sa Federation of Motorela Operators and Drivers in Cagayan De Oro nga nasabtan man nila ang proseso sa pagpagula og bag-ong fare matrix alang sa motorela, apan dili ikalimod ang ilahang kabalaka nga posibleng pipila kanila muhunong na sa pagpamasada tungod sa walay hunong nga pag-arangkada sa presyo sa lana.
Matod pa ni Cempron nga nagpanglingo na ang ilahang mga kaubanan tungod dili na makasapal ang ilahang kita sa pang-adlaw-adlaw nga panginahanglan sa ilahang pamilya. Labing nabug-atan sab kadtong mga driver nga igo lang naga-abang og unit.
Dugang pa ni Cempron nga tungod wala sab silay nadawatan nga ayuda sa panggamhanan, mas prayoridad nila nga maduso ang usbaw pletehan aron man lang sila makalahutay sa ilang panginabuhian.
Photo courtesy:Dreamstime.com
