Usa ka mabulukong indigay sa arts nga gitawag og “Hulagway sa Yuta: Soil Painting Competition” ang ang gipahigayon niadtong nakalabay nga adlaw sa Bukidnon Center for Culture and the Arts sa Barangay Laguitas, dakbayan sa Malaybalay.
Sumala sa pakighinabi sa Juander Radyo Malaybalay kang Senador Juan Miguel “Migz” Zubiri, iyang gipasigarbo ang “world-class” nga talento sa mga lokal nga artist dungan sa pag-abli sa unang exhibition sa bag-ong Bukidnon Museum.
Gidayeg usab niya ang maong pamaagi sa arte nga nagpasidungog sa pito ka tribo sa Bukidnon, ug gitawag kini nga “tinuod nga garbo” sa Mindanao.
Alayon niini gidapit ni Zubiri ang mga turista gikan sa Cagayan de Oro ug uban pang dapit sa nasud nga bisitahon ang museyo aron masaksihan ang kabilin ug kultura sa probinsya pinaagi sa natural nga pamaagi sa pagmugna og arte.
Isip pagpadayon sa suporta, iyang gipahibalo nga himoon nang tinuig nga tradisyon ang maong kompetisyon isip kabahin sa Kaamulan Festival, samtang plano usab sa kagamhanan nga magbutang og coffee shop sa venue aron mahimo kining destinasyon sa mga biyahero ug matabangan ang mga artist nga mabaligya ang ilang mga obra
Sa maong kompetisyon nasakmit ni Reynante L. Yubat ang first place sa Open Category sa iyang obra nga “KABILIN SA YUTA”, samtang para sa Professionals category champion si Phel Salmasan sa iyang obra nga “HIMAYA SA YUTA” nga inspired sa panginabuhi-an sa ilang lungsud sa Cabanglasan kon diin abunda sa agrikultura sa mais.
Photo Courtesy: Senator Migz Zubiri fb page
