Nagpadayon karon ang hugot nga monitoring sa Department of Trade and Industry (DTI) ug Department of Energy (DOE) sa mga presyo sa produktong petrolyo sa tibuok lalawigan sa Bukidnon.
Kini human gihangyo sa Provincial Price Coordinating Council ang DOE nga susihon ang pagsunod sa mga gasoline stations sa saktong presyo.
Sumala ni DTI Consumer Protection Division Head Junar B. Merla sa Ekslusibong pakighinabi sa Juander Radyo Malaybalay, daghan nang mga gasolinahan ang na-inspeksyon sa nagkalain-laing dapit una na niini ang Dakbayan sa Valencia adunay 12 ka gasolinahan ang na-monitor, Malaybalay 9 ka gasolinahan ug uban pang Lungsod sama sa Kitaotao, Quezon, Don Carlos, Dangcagan, ug Kibawe
Dugang pang gibutyag sa DTI nga duna nay pipila ka mga gasoline stations nga na-isyuhan og warning human nakita nga wala nisunod sa Suggested Retail Price (SRP) nga gilatid sa DOE.
Gipaabot na usab ang pinal nga report gikan sa legal department sa DOE para sa posibleng pag-isyu og show-cause order batok sa mga malapason.
Dugang pa, duna usab mga gasolinahan nga temporaryong nagsira tungod kay nahutdan og stock. Kauban sa DTI ang PNP-CIDG sa pag-validate niini aron masiguro nga walay nagpahimulos o nag-overpricing sa sitwasyon.
Photo Courtesy: DTI
