Pormal na nga gipasang-at sa hawanan sa Konseho ang sugyot ordinansa nga motugot sa usbaw pletehan sa motorela sa Cagayan de Oro.
Atol sa regular nga sesyon, kagahapong adlawa giduso ni Konsehal Eric Salcedo, chairman sa Committee on Public Utilities ang proposed ordinance no. 2026-224. Laraw niini nga amyendahan ang daan na nga Motorela Ordinance sa syudad.
Lakip sa buot amyendahan ang pag-usbaw sa pletehan sa motorela nga magbase sa kasamtangang presyo sa gasolina. Gawas niini, gipaniguro sab ang pribilihiyo kon diskwento sa mga estudyante, senior citizens ug mga persons with disability.
Gikan sa Php10, himuon nga Php12 ang minimum nga pletehan sa motorela. Sa ulahi, giaprubahan kini nga sugyot ordinansa sa ikaduha ug pinal nga pagbasa sa Konseho.
Apan pagpaklaro ni Salcedo nga dili pa kini mapatuman sa pagkakaron, tungod moagi pa kini sa buhatan sa Mayor kinsa magpagula sa fare matrix. Lauman nga human sa Semana Santa posibleng mo-take effect ang usbaw pletehan sa motorela sa syudad.
Photo courtesy: Ivory
