Nadakpan sa hiniusang pwersa sa Philippine Drug Enforcement Agency Regional Office 13 (PDEA RO 13) ug Tagbina MPS ang usa ka principal sa pampumblikong tunghaan atol sa usa ka buy-bust operation niadtong nakalabay nga adlaw, didto mismo sa Purok 3, San Jose, Barangay Poblacion, Tagbina, Surigao del Sur.
Giila ang suspek nga usa ka 45-anyos nga lalaki, ulitawo, ug residente sa maong dapit, kinsa nagsilbi isip District 1 School Supervisor (Principal III) sa lungsod sa Tagbina.
Gipahigayon ang operasyon human sa gihimong lapad nga surveillance ug pag-verify sa mga otoridad sa giingong pagkalambigit sa opisyal sa ilegal nga druga sa maong lugar. Nakuha gikan sa posisyon sa suspek ang duha ka sachet sa gidudahang shabu nga nagkantidad og Php 6,800.00 lakip na ang marked money nga gigamit sa transaksyon.
Gipahayag ni Dir. Laurefel Gabales, ang Regional Director sa PDEA RO 13, usa kini ka seryoso nga kaso tungod kay ang suspek usa unta ka ehemplo ug giya sa mga kabatan-onan sa sektor sa edukasyon, apan nalambigit naman hinuon sa dili maayong binuhatan. Gipahinumdoman usab niya ang tanan nga ang posisyon sa gobyerno dili angay gamiton sa paghimo og ilegal nga buluhaton nga makadaot sa komunidad.
Alayon niini, gidala gilayon ang suspek sa kustodiya sa Tagbina MPS ug mag-atubang og kasong paglapas sa Section 5, Article II sa Republic Act 9165 o ang Comprehensive Dangerous Drugs Act of 2002. Nagpabilin usab nga lig-on ang baruganan sa PDEA sa paggukod sa mga High-Value Individuals aron mapanalipdan ang katilingban batok sa dautang epekto sa gidiling droga.
Photo courtesy: PDEA 13
