Nagkahiusa ang mga Local Government Unit (LGU) sa tibuok probinsya sa Bukidnon uban sa nasudnong kampanya sa pagpahigayon sa “Libreng Bakuna” batok sa rabies, subay sa pag-obserbar sa gihingusgan kampanya sa “Rabies Awareness Month” ning bulan sa Marso 2026
Gipahimangnoan ang publiko nga dili pasagdan ang ilang mga binuhi, ilabina ang mga iro, nga maglatagaw sa dalan aron malikayan ang posibilidad nga makapaak kini ug makatakod sa rabies.
Matod pa ni Dr. Juniver Flores, sa pakighinabe sa sibyahann nga kung ang rabies virus makasulod na sa lawas sa tawo, kini molatay pinaagi sa kaugatan ug spinal cord padulong sa utok, nga mahimong hinungdan sa grabeng kadaot ug kamatayon.
Lakip sa mga timailhan sa rabies mao ang kahadlok sa tubig (hydrophobia), kahadlok sa hayag (photophobia), ug kahadlok sa hangin (aerophobia). Sa higayon nga molala na ang kondisyon ug makita na ang mga sintomas, giingon sa mga health experts nga wala nay tambal ug 100% kini makamatay.
Gipasiugda usab ni Dr. Samuel Mededas Valencia City Veterinarian ang kahinungdanon sa responsableng pagpamuhi sa mga hayop. Sumala kaniya, ang pinakamaayong depensa batok sa rabies mao ang pagpugong niini sa sinugdanan pinaagi sa regular ug updated nga pagbakuna sa mga iro ug iring.
Base sa datos sa Department of Health (DOH), niabot sa 426 ka mga kaso sa kamatayon tungod sa rabies sa Pilipinas niadtong 2024, mas taas kumpara sa 235 ka kaso niadtong 2020. Sa sinugdanan sa 2025, gikan Enero hangtod Septiyembre 20, nakatala na usab ug 260 ka kaso sa rabies sa nasud.
Photo Courtesy: DOH
