Pormal na nga giablihan ang ika-52 nga selebrasyon sa Kaamulan Festival sa probinsya sa Bukidnon karong aldawng Huwebes, Marso 19, 2026. Ang seremonya gipangunahan ni Gobernador Rogelio Roque kauban ang mga sakop sa Sangguniang Panlalawigan, mga opisyal sa siyudad ug munisipyo, ug ang mga Indigenous Peoples Mandatory Representatives (IPMR) aron hatagan og bili ang panaghiusa sa pito ka mga tribo sa probinsya.
Sa esklusibong pakighinabe sa juander radyo malaybalay pinaagi ni Board Member Marlon Brando B. Dinlayan, kinsa usa usab ka lumad sa Bukidnon, iyang gihatagan og gibug-aton ang kamahinungdanon sa pagpreserba sa kultura nga kabilin pa gikan sa mga katigulangan.
Matod pa niya, isip mga lumad nga adunay dugong Bukidnon, usa kini ka dakong garbo ug responsibilidad ang pag-atiman ug pagpanalipod sa tradisyon aron kini mapadayon sa mga sunod nga henerasyon.
Gawas sa kultural nga aspeto, gipaabot usab ni BM Dinlayan ang iyang panghinaot alang sa malampuson ug hapsay nga selebrasyon para sa tanang mga bisita ug lokal nga residente.
Alayon niini giimbitahan ang tanan sa pagsuroy sa mga booth ug mga pasundayag sa Kaamulan Capitol Grounds aron masaksihan ang kabilin sa mga pito ka tribo nga maoy naghatag og kolor ug kalamboan sa tibuok probinsya sa Bukidnon.
Photo Courtesy: Bukidnon kaamulan
