Opisyal nang gi-atras sa legal defense team ni kanhi Pangulong Rodrigo Duterte ang ilahang “request for leave to appeal” sa usa ka confidential decision sa International Criminal Court. Gibawi ni lead counsel Nicholas Kaufman ang hangyo nga mangayo og pagtugot sa pag-apela batok sa usa ka confidential decision sa ICC Pre-Trial Chamber I.
Gisang-at sa depensa ang pormal nga pagbawi niadtong Marso 16, 2026, human sa order sa korte niadtong Marso 13. Gipasabot sa depensa nga ang pagbawi gihimo “without prejudice,” nga nagpasabot nga mahimo gihapon nila kining ipasaka pag-usab sa umaabot nga panahon.
Ang apela may kalabutan sa hangyo sa depensa nga i-diskwalipikar ang legal representatives sa mga biktima, lakip sila Joel Butuyan ug Gilbert Andres. Nagtuo gihapon ang kampo ni kanhing presidenti Duterte nga adunay conflict of interest sa ilahang pagrepresentar sa mga biktima.
Kini nga lakang kabahin sa padayon nga legal battle sa ICC, samtang anaa sa kustodiya sa korte sa The Hague, Netherlands ang kanhi presidente.
Photo Courtesy: Nicholas Kaufman /ICC
